Gaetano Macrì vive a Tropea e lavora a Vibo Valentia come segretario presso un Istituto per ragionieri. E’ autore di numerose poesie in dialetto calabrese, ma sino ad oggi, nonostante qualche interessante offerta editoriale, ha sempre rimandato pubblicare le sue opere.
I vecchji
Apritili sti casi ’e vecchjiarei,
chjiuditili l’ospizi a tutti i vandi,
cumpatitili e curatili comu ninnarei
ca’ puru nui diventamu ‘randi.
U sacciu ca’ stu pigulu nd ‘abruscia,
nd’ puliciamu quandu cercanu nc’una cosa
e alivoti nd’arraggiamu si fermi nta cascia
ti guardanu e aspettanu ca stessa posa.
Ndi pari a nui! Ma quantu ndi servunu!
preganu e tremanu pi piccati chi facimu,
d’amuri e forza a casa nd ‘inchinu,
senza d’ihji chjiù amaru è stu caminu.
Ciciuliati cu’ vecchjiu fina chi ‘l’ai,
dassalu u parra e u sbraitea,
ti voli beni e si po’ ti caccia guai
ca campa non pi diu ma pi ‘tea.
Lìttira a pruvvidenza
A varva nd’ criscju
fin’è dinocchja
u latti ndi cula a cannali
e figghjola non ndi nesci.
Zina’mmò
comu sempri pregò a za’ Betta
anzina a quandu non si tagghjò a lingua
... pruvvidisti e pruvviduti
che ‘ poviri su mbizzati cu luppini e pistinachi.
Dindi si pimmu veni
avimu u ndi lavamu all’acqua i mari
o puru di funtani.
Statti pracida...
nui non’tindi facimu curuja cull’ova.
Si ‘pinnui nci si e a mu veni
ammu cuminci di lugna di pedi.
Cusapi quantu nci menti
u t’arriva sta littra
e su sicuru ca dopu ca’ lej
tindi futti
tantu tu si ‘na disgraziata
vatrova di quant’avi chi sai tuttu
a mai ndi dignasti armenu i ‘narrisata
e penzu ca anzi si potivi
puru l’acqua du mari
e stu suli ti vindivi
ndi facisti peju i Sa’ Tumasi
sulu ca nui avimu u vidimu ‘pi du’ jorna
u simu sicuri ca no’ si tratta ‘e sonna.
Veni! Veni! Senti!
ndi resta tanta forza nta sti mani
chi ‘ti facimu vidiri comu ‘mpastamu u pani.
Veni! Veni! Ca non ti ripenti!
nui simu degna genti.
|
|
|
|
|