Francesco Distilo vive a Galatro ed è un ex insegnante, attualmente pensionato. Grazie alla sua produzione poetica di oltre mille componimenti, sia in vernacolo che in lingua, ha avuto numerosi riconoscimenti in vari concorsi nazionali ed internazionali. Scrive su: "Calabria letteraria", "Calabria sconosciuta", "Parallelo 38" e "La Procellaria". E’ stato per diversi anni corrispondente per "La Gazzetta del Sud", "Il Tempo", "Il Giornale d’Italia", "Il Giornale del Mezzogiorno", Ha pubblicato: "Spighe d’oro", "U stabbulimentu ‘i Galatru"; "Polistena: un lontano e caro ricordo"; "Vibo Valentia: dal 1940 al 1946".

Calabria, tu sì bedha veramenti,
cà sì ricca di tantu e tantu mari,
di ‘nu mari lìmpidu, risprennenti,
chi faci tutti quanti nnamurari.
I praji naturali arricchiscinu
stì mari chi ti fannu gran curuna,
p’ò sanu suli i genti abbundiscinu,
quando, d’estati, mègghiu sprenne a luna.

‘U Joniu e ‘u Tirrenu su ddui diamanti,
chi fannu di stà terra ‘nu villinu,
l’azzurru di stì mari è ‘nu carmanti,
chi paci duna a ogni cittadinu.

Abbundanu pisci d’ogni qualità:
i tunni, i cristaddedhi e ‘u pisci spata,
di chisti si nòtrica a gurdità,
cu’ veni ccà mu passa ‘na jornata.

A cotrari, a giuvani e vecchiaredi,
a fìmmani, a òmani, a sani e malati,
a chisti, ‘u mari nostru, nci cuncedi
mu pàssanu nsaluti tutt’astati.

L’acqua i stì mari, ch’è medicina,
‘u suli ch’è ‘nu vaccinu previntivu,

l’aria sana chi di lu mari mina,
ndi dùnanu saluti, dùnano motivu.
‘U jauru d’ ‘u jodiu ndi risana
d’ ‘a tussi, da zegra e ‘u pettu apri paru,
cu’ ccà veni ‘u passa ‘na settimana,
s’abbidi comu ‘u mari è ‘nu riparu.

I miedici, i miedicini e i speziali,
i nui stànnu luntani tantu, tantu,
pecchì, i mari nostri, di tutt’ ‘i mali
sù veramenti miedici i gran vantu.
Io vi salutu, mari calabrisi,
cà siti di stà terra taumaturghi,
curati li malati senza spisi,
annettati ‘u ntestinu senza purghi.

Siti d’ ‘a Calabria chidha chianura
d’acqua ch’ ‘i poeti tutti cantàru,
siti d’ ‘u celestru la gran pittura,
chi l’artisti cchiù noti, poi, imitàru.

Di mbernu, quandu facìa friddu forti,
quandu ‘u tempu fora pannizzijava,
oppuru s’ ‘u jelu mpiccicava ‘i porti,
‘u focu ntra ogni casa vampijava.

Zzumpi di castagnara e tanti astèdhi,
fraschi sicchi d’ìlici e di bruvèra,
cu chisti s’abbrusciavanu i truppèdhi,
chi parìa ca sbampava ‘na costèra.

‘U caddu, chi dhà spandìa tuttu ntornu,
coddijava i càmmari e a cucina,
‘u lustru chi mandava parìa jornu,
nò nc’èra bisognu d’ ‘a lampadina.

Vicinu, a hiancu di stù foculàru,
‘na pignata ‘i suriaca jia gugghiendu,
era ‘u pastu d’ogni bonu massàru,
chi ntr’ ‘a stadha li vacchi jia pascendu.

Ntornu, seduti supa a zzuccarèdhi,
tutt’ ‘a famigghia dhà si coddijava,
èranu vecchi, giuvani e cotrarèdhi,
mentri ‘u pappù fèraguli cuntàva.

‘U focu, ‘u foculàru, lu brascèri,
tenènu uniti tutti li famigghi,
mò, mbeci, nò è cchiù com’ahhieri,
luntani sugnu patri, mammi e figghi.

Stì cosi, mò, di tutti quanti ‘i casi,
cacciati furu e vìnnaru cangiati,
a postu ‘i chisti fìciaru mu trasi
u gas e tant’atri cosi cumbinati.

Pe’ chistu vinni menu lu rispettu
tra mammi, patri, figghi e parentèra,
chidhu focu nò nc’è cchiù sutt’ò tettu,
finìu chidhu tempu: mò è ‘na brutta era.