Francesco Brancia
(Nicotera - VV - 2/9/1929)Francesco Brancia vive a Vibo Valentia dove esercita, da molti anni, la professione di avvocato.
Ha pubblicato "Fuochi a Tuccina" (Ed. Corso di Ferrara): poesie in lingua. E’ autore del dramma sacro "La passione di Cristo", di "Furori e silenzi" e di "Favole e madrigali" (poesie in vernacolo), in buona parte apparse su riviste e periodici.
Collabora a Calabria letteraria e a Proposte.
Finiu lu tempu
La strata vecchia non la trovi cchiuni,
chija di San Franciscu aundi ivi
mu cogghi hjuri a tutti li cantuni
e comu ‘na farfalla ti movivi.
Crisciru li palazzi e ’ndi tagghiaru
l’arburi aundi l’unbra ’ndi parava;
pi mia e pi ttia li hjauri passaru:
finìu lu tempu chi sprenduriava.
Mò non ti cantu cchiù comu ‘na vota:
la vuci nesci comu ’nu rispiru,
la testa ’nta lu lettu si rivota,
puru li toi pinzeri s’indi iru.
Ma resti sempri comu ‘na curuna
subba l’anni chi ficiru lu giru;
non sacciu aundi si, occhi di luna,
ti portasti lu cori e lu rispiru.
Cala la sira
Suli non d’avi cchiù, cala la sira
subba lu Murtijtu e la Marina,
e la campagna chi diventa nira
va pimmu dormi sinu alla matina.
S’abbistanu li luci dilla Chiana,
di la Sicilia e, doppu, di lu Faru,
la parrasaia di l’acqua è cchiù luntana,
fa la chiamata pi lu marinaru.
E partinu li varchi e li lampari:
ognuna d’iji scegghi lu caminu,
senza scrusciu di vuci ‘ta lu mari,
cu la notti davanti e lu distinu.
|
|
|
|
|